فيصل

فيصل خليفة :

للتواصل مع صفحة الكاتب على الفيسبوك الرجاء إضغط هنا

فِكرة التَسجيل

لم فى الواتساب وَسيمه

تقوم تسجِّل ليك كلام

حِتة مُطايبه او سلام

ماشوق وحُب

وكلام غرام

ساكِت كلام

وإت يا الخفيف

من خِفة الرُوح تنجذِب

من بحّة الحِس البَراهو

من رِقة الصُوت العَذِب

تفضل تعيد زي العَوير

وهى ليها ساعه ولاهِنا

مَدفونه فى سابع سَرير

وإت يا العوير شغال تعيد

تبداهو من اوّل جديد

وهى ما هِنا

مشغوله بى موضوع جديد

واتّ بتعيد

شغّال تعيد

كيف نَبرتها

نُص الكلام

حِس ضحكتها

ولَه لهفتها

وقَه قهقتها

ومَه مهمتها

وحفِظتها..بِى صَمّتها

وهى ما هِنا

فى عِدتها

مِن ساعه أُمها نادتها

وكلامها ليك القالتو

زاااتو نِستو

واتّ بتعيد

زى البليد…

فِكرة سَماعِك وإنتى ماف

إنتى البتنضُمى هسّه دى

إنتى الهَدِى..الهَسّه ماف

انا ياخ بخاف!

ماتسجِلّى

ماتبقى لى مافيش و فِى

يا تبقى فّى

يا تبقى ماف!

ماتبقى قاعده وشكل ماف

او تبقى مافى وشكل فى!

مِن وين اجيب ليك هسّه حِس

زى حِسّك القُلتيهو قِبيل

انا حِسّى ماف!

كِيف انتزِع مِن نفسى حِس

شان يبقى زى حِسّك قِبيل

وانا زول بخاف!

ناشِف مِن الإحساس نَشاف

شمّاعه فى بَص طُولو يوم

شافِع بحنِّس شان جِنيه

قطع الأحاسيس مِن خِلاف

كل العصافير فى العُيون

بِتغنّى والأيام عِجاف

كُل الشوارِع إختلاف!

ماتسجِّلى..

مبسوطه بتنقّى الحَنين

وانا زُول مِن الإحساس ضَنين

مابقدر ابقاك لَحظتِك

زيّك اساير ضحكتِك

اضغط على حِسى الهَدا

شان يبقى حِسّك وإنتِ ماف

قُلتيهو قِبيل

وانا كُنت ماف

وانا هسّه فى

بس حِسّى ماف!

قطعوا الأحاسيس مِن خِلاف

ماتسجِّلى

إتصّلى شان ابقاكِ صاح

وتكونى زاتِك إنتى دى

إنتى البتنضُمى هسّه دى

إنتى الهَدِى

الماكى ماف

إحساسى وإحساسِك سواء

سواء فى الهواء

ذات المُجابده والنَوىَ

إتصّلى ابقينى الهَدا

وابقاكِ إنتى الهسّه دى

الماها ماف

شان ما أخاف!

تعليقات الفيسبوك

اترك تعليقاً

‫شاهد أيضًا‬

ذُوق

دا من ذوقِك ومن كُتر اللطافه الفيك ومن كَم الحلا الفوقِك دا من ذوقِك.. حركتى ولاخطيره شديد…