tumblr_lnpmhcW9dM1qlz2qqo1_500[40]

فيصل خليفة :

للتواصل مع صفحة الكاتب على الفيسبوك الرجاء إضغط هنا

**
حَمّام كَنار او تُرعه
ما حمّام بَحر..
شُفّع تمام الغَبشه
والفاقه الفَقُر..
ياكَمبو صابرين يا حزين
ياكَمبو صابرين يا حنين
نِسوانكو فى التُرعه العَصُر
قاعدات حِبالهِن شُوك
بتغسل وتغنّى وتَشُر..
زَحمة فساتين القُماش
وتِياب خُدر وتِياب حُمر…

يا كَمبو ياصابرين
بالله كيف عائشين
بين تُرعه وابعِشرين
كُل البُيوت مِن طِين
حُوضين لضَرب الطُوب
وخَمّار زِباله حزين..
وينها المدارس وين
وين رَوضة الشُفّع
وعِيادة التَحصين
بتخشوا فى التصويت

وبجوكو مسئولين؟

يا بُكسى لو تَسمح
بِدقيقه او اتنين..
ما الحكمه فى الإسمنت
ما العِبره مِن الطين..
يا كَمبو يا اُستاذ
عَلمِّنى ياصابرين..
انا مُزدرى وتقيان
درسّنى حِصه يقين..
انا لم نُورى يموت
بنعل واسِب عِشرين..
انا عندى تلاجه انا عندى غساله
انا عندى تلفزيون..
انا بحضر الاخبار
واولادى اسبيستون..
يا بُكسى وقفنى
ياكمبو قرّينى
علمنى صلحنى

شان نحن مغشوشين!!

 

 

تعليقات الفيسبوك

اترك تعليقاً

‫شاهد أيضًا‬

ذُوق

دا من ذوقِك ومن كُتر اللطافه الفيك ومن كَم الحلا الفوقِك دا من ذوقِك.. حركتى ولاخطيره شديد…