304797_10151090154629694_1522701885_n

فيصل خليفة :

للتواصل مع صفحة الكاتب على الفيسبوك الرجاء إضغط هنا

**

ارُقدن فى حباب عينىّ

غُطاكم رِمشى والأهداب

مارق هسّه يا حلوين

مودّع ريحة الحِلّه

ومفارق ناسى والأصحاب

حبيباتى نبض القلب ونِن العين

سلمى و وعد..

حِليوات يا بنات نايمات

جميله النسمه بتداعب خُصلكم وانتوا ماداريات

حنين الليل يغطيكم يهدّيكم

حرس عينيكم الحلوه قعد ما فات

وسادتكم ضفايركم

اخبّى دموعى ماتنزل تحصلكم

تصحيكم تحيّرنى وتغيركم..

 

كُراعِك حصلت اُختك

عليك ياسلمى لِمّيها..بتصحّيها

تكورك تزعظ النايمين

براك يا حلوه عارفاها

صغيرونه خفيفونه و نُومها خفيف

ظريفونه..تطلع لىّ فى ضهرى

ابوى ادّينى طاقيتك

ابوك اِديكى عينيهو

وإن دُرتى القليب شيلى..

 

حبيباتى

فوتتكم تمرق الروح

تزيد آهاتى انّاتى تزيدنى جروح

تدقّر فى الحِليق عَبره

تطير دمعاتى من عينىّ

تنقّط فى خدود سلّومه تصحانى

ابوى مالك؟

ابوك يابِتى ما مايل

جيت من شان اغطيكم

شان البرد مايجيكم

ارُقدى آبِتى نومى خلاص

بُكره الروضه ما ماشه

هديك اللبسه جبتها ليك

معاها الشنطه والكرّاس

ومصروفك مع اُمك…نومى خلاص

بس يا ابووى!

عُيونك لى شنو بِدمّع

ولابس عِمتك والشال

وجمبك شنطتك يابا

ابوى ماش وين؟

سكتّ مسااافه ما ردّيت

سؤالك حرّك الآلام

بكيت من تانى ماحسيت

اقولِك إِيه..مُسافر من كُتر غُلبى

عشان يا حلوه ماتقرى

و اُختك تقرأ والجايين

عشان قسّوها عِيشتنا

عشان يا حِلوه ديل قاسيين

عشان اُمِّك تجامل

لم ناس الحِلّه يطلعوا لى عرس ماشين

تبارك راسها مرفوعه

وتخُت الشئ البيملأ العين

 اقولِك إيه واعيدلِك إيه

عشان غيركم فى ناس تانيين

ابوى اخواتى ناس اُمى

ارُقدى آ بِتى نومى خلاص

ابوك شايل حِمل بيتين

ورقدت سلمى سابقاها الدموع للنوم!

 

قامت وعد مفزوعه

مِلت عليها هدّيتها

صاحت فينى فايت وين؟

خلاص يا بِتى ماشى خلاص

مخلّى عيونِك الحلوين

ابوى جيب لىّ حاجه معاك

بتأمرى إنتى يا حلوه

ابوى جيب لىّ طيارتين

عشان ماتطيرى بيهم ويييين؟

شان بالاولى اسافر ليك

وشان بالتانيه ارجع بيك

حرام يا حلوه داب قلبى

وقطعتوا الفضل مِنو

مرقتو الجُوه مُتخبى

عشانكم إنتو داسنو

تعالن لىّ..تعالن جاى

وضميتُم على قلبى وبين اعضاى

وختيتم وغطيتهم

فتحت الباب..قفلتو وراى!!

تعليقات الفيسبوك

اترك تعليقاً

‫شاهد أيضًا‬

ذُوق

دا من ذوقِك ومن كُتر اللطافه الفيك ومن كَم الحلا الفوقِك دا من ذوقِك.. حركتى ولاخطيره شديد…